kaar-e-duniya main kuch ae dil nahin behtar tu bhi

kaar-e-duniya main kuch ae dil nahin behtar tu bhi
koocha-e-ishq se chun laya hai kankar tu bhi

jab talak baam-e-falak par hai, sitara tu hai
aur agar toot ke gir jaye tau pathar tu bhi

ye qanaa’t bhi muhabbat ki ataa hai warna
shehr main aur buhat, aik gadager tu bhi

mere andazay se kuch barh ke thi zalim duniya
paaon rakh rah-e-tamanna pe sanbhal ker tu bhi

ajnabi lagta hai kiyun aalam-e-bedaari mujhay
kahin rehta hai mere khwaab ke andar tu bhi

main usi morr pe manzil ki talab chorr aai
ho liya jab se mere saath safar per tu bhi

main kiran war shab-e-mah main tujh per utri
mauj der mauj utha ban ke samander tu bhi

mangna bhool gai main tau tamanna ka sila
do jahan saamnay phailay thay baraber tu bhi

(Samina Raja)